Coidando da auga, coidamos de ti

O salón de plenos da Casa do Concello acolleu o pasado 8 de abril a presentación do novo slogan que acompañará ao logotipo de Augas de Ames EPEL, coincidindo cunha etapa de forte aposta pola municipalización do ciclo integral da auga en Ames.

O alcalde e presidente da entidade, Blas García, aproveitou o acto para facer balance deste primeiro ano de funcionamento, no que se investiron 340.000 euros en obras e melloras.

O lema “Coidando da auga, coidamos de ti” foi presentado nun acto no que participaron, ademais de Blas García, Gustavo Nieto (concelleiro de Obras e Servizos Básicos e membro do Consello de Administración), Gemma Otero (xerente da entidade), Ramón Cordido (representante da empresa La Rayuela e deseñador do slogan e da imaxe corporativa) e tres persoas do persoal do servizo.

Durante a presentación, Ramón Cordido explicou o proceso creativo: “Pedíusenos unha frase que promovese a sensibilización e o consumo responsable da auga, combinando a idea de auga e saúde. Así xurdiu ‘Coidando da auga, coidamos de ti’, unha mensaxe sinxela, con sonoridade e que implica á veciñanza como parte dunha comunidade. A tipografía escollida, tipo script, humaniza e achega personalidade á imaxe corporativa”.

Investimentos nas redes de abastecemento e saneamento

A xerente, Gemma Otero, destacou a aposta pola creación dunha empresa pública que xestiona un servizo esencial como o ciclo integral da auga: “Ames é pioneiro en Galicia na municipalización a través dunha entidade pública empresarial local. O balance deste primeiro ano é positivo, con preto de 340.000 euros investidos, tanto en abastecemento e saneamento como en medios para a operativa do servizo. O slogan presentado reflicte á perfección o noso compromiso co coidado dun ben básico e imprescindible para a vida”.

Dentro dos investimentos en redes de abastecemento e saneamento, cómpre destacar os 151.788,29 € destinados a 10 actuacións, entre elas: instalación de tubaxes de fecais e pluviais na avenida Poeta da Maía (47.976,50 €), reparación de cruce transversal en Piñeiro (4.060,52 €), reforma do local de oficinas no Milladoiro (13.255,37 €), acometidas en Costoia e Portanxil, execución de rede pluvial en Ventosa (15.216,05 €), actuación na N-550 no Milladoiro (21.000 €), e acometidas de abastecemento e saneamento (30.000 € en total).

Para o funcionamento operativo investíronse outros 148.811,33 €, destinados á adquisición de materiais de reparación, compra de sete vehículos e ferramentas de segunda man, renovación de instalacións técnicas en Pegariños, materiais para a EDAR de Bertamiráns, Sisalde e O Milladoiro, entre outros. Tamén se investiron 37.665,01 € en oficinas e espazos administrativos.

En total, no primeiro ano de funcionamento realizouse un investimento global de 338.264,63 €.

Augas de Ames EPEL: un ano camiñando xuntas e xuntos

O presidente da entidade e alcalde, Blas García, salientou: “Este primeiro aniversario é unha boa ocasión para facer balance. Augas de Ames comezou a funcionar o 1 de abril de 2024, froito dun compromiso político iniciado en 2015. Non só traballamos as persoas que formabamos parte do Goberno municipal daquela, senón tamén outros concelleiros e concelleiras que impulsaron a creación da entidade, como Quique Costas, Chus Boo ou Pilar Candocia. Tamén quero lembrar a José Miñones, que como alcalde deu os primeiros pasos neste proxecto”.

Blas García destacou o valor humano da empresa: “O maior activo da EPEL é o seu persoal. Grazas á subrogación do persoal da concesionaria anterior, puidemos comezar cun equipo con experiencia e coñecemento da rede, o que facilitou enormemente o proceso”.

Mirando cara ao futuro

Entre os principais retos, Blas García subliñou a mellora da ETAP de Lens, que actualmente só funciona ao 30% da súa capacidade. O obxectivo é que poida abastecer O Milladoiro, o que require un investimento superior aos dous millóns de euros. “Na actualidade seguimos comprando auga a Santiago de Compostela por un custo anual próximo aos 400.000 €. Se logramos financiamento, poderemos investir ese aforro en levar auga desde Lens ao Milladoiro”.

Outro obxectivo é ampliar o abastecemento no rural e completar o saneamento nas parroquias de Piñeiro e parte de Tapia. Tamén se avanza na dixitalización e mellora da eficiencia do ciclo urbano da auga, grazas a unha axuda de 1.131.309,77 € concedida polo Ministerio para a Transición Ecolóxica e o Reto Demográfico.

Finalmente, Blas García recordou o compromiso coa ampliación da EDAR de Sisalde, para a cal se solicitará a declaración de interese xeral do Estado e o financiamento correspondente.

Noticias relacionadas

• La Voz de Galicia: Augas de Ames cumpre un ano con 340.000 € de investimento e nova oficina no Milladoiro
• El Correo Gallego: Ames buscará financiamento para que a ETAP de Lens abasteza O Milladoiro
• AMSGO!: Augas de Ames presenta o seu eslogan e realiza balance do seu primeiro ano de funcionamento